އެމްއެމްޕީއާރސީގެ ޚިޔާނާތުގައި ބައިވެރިވި މީހުންގެ ލިސްޓު މަޖިލީހަށް ހޯދާ އެކަން ދިރާސާ ކުރަމުންދާ ކޮމީޓީން އެމްޑީޕީގެ ޕާލަމެންޓަރީ ގުރޫޕުގެ ލީޑަރ ހުޅުހެންވޭރު ދާއިރާގެ މެންބަރު ޢަލީ އާޒިމް ވަކިވެވަޑައިގެންފިއެވެ.

ޚިޔާނާތުގައި ބައިވެރިވި މީހުންގެ ލިސްޓު ދިރާސާ ކުރަމުންދަނީ ޖުޑީޝިއަރީ ކޮމިޓީއާއި ސަލާމަތީ ޚިދުމަތްތަކާއިބެހޭ ކޮމިޓީގެ ޖޮއިންޓް ކޮމިޓީއަކުންނެވެ. މި މިކޮމިޓީގައި ކުރިން އާޒިމް ހިމެނިވަޑައިގެންފައިވާ އިރު މިހާރު އޭނާގެ ބަދަލުގައި މަޖިލީހުގެ ނައިބު ރައީސް އީވާ ޢަބްދުﷲގެ ނަން ވަނީ ހުށަހަޅާފައެވެ.

ޢާޒިމް ވިދާޅުވީ ކޮމިޓީން އިސްތިއުފާ ނުދޭ ކަމަށާއި ނަމަވެސް ކޮމިޓީގެ މަސައްކަތުން މިވަގުތު ދުރައްޖެހިލީކަމަށެވެ. އަދި ދުރައްޖެހިލީ ކޮމިޓީގެ މަސައްކަަތަށް އެއްވެސް ވަރަކަށް ނުފޫޒު ފޯރުވަން ނޫޅޭކަން ހާމަކޮށް 'އިންޓެގްރިޓީ' ހިފަހައްޓަން ކަމަށެވެ.

ރައީސް އިބްރާހިމް މުހައްމަދު ސޯލިހު އުފައްދަވާފައިވާ އެސެޓް ރިކަވަރީ ކޮމިޝަނުން މަޖިލީހަށް ފޮނުވި ލިސްޓުގައި އާޒިމްގެ ނަންވެސް ވަނީ ހިމަނާފައެވެ. ކޮމިޝަނުން ފުރަތަމަ ފޮނުވީ 267 މީހުންގެ ނަން ހިމެނޭ ލިސްޓެކެވެ. އެ ލިސްޓުގައި އާޒިމްގެ ނަމެއް ނެތެވެ. ނަމަވެސް ފަހުން އިތުރު 14 ނަމާއެކު 287 މީހުންގެ ލިސްޓެއް ކޮމިޝަނުން މަޖިލީހަށް ފޮނުވިއެވެ. ފަހުގެ ލިސްޓުގައި އާޒިމްގެ ނަން ހިމެނެއެވެ.

މީޑިއާ ވާހަކަ ދައްކަވަމުން އާޒިމް ވިދާޅުވީ އޭނާގެ ނަން ލިސްޓުގައި ހިމެނީ އެ ލިސްޓު އާންމުކުރަން ނުކެރޭނެ ކަމަށް ބަލާފައެވެ. ރައީސް ނަޝީދުއާ އެއްވަރަށް އޭނާވެސް ގޮވާލަކީ އެލިސްޓު އާންމުކުރުމަށް ކަމަށެވެ. އަދި ތަކުރާރުކޮށް އެމްއެމްޕީއާރސީގެ ފައިސާގައި ޖެހިފައިނުވާނެ ކަމަށް އާޒިމް ވިދާޅުވިއެވެ.

އެމްއެމްޕީއާރސީގެ ޚިޔާނާތުގެ ފައިސާ ލިބިފައިވާ މީހުންގެ ތެރޭގައި ކުރީގެ އާއި މިހާރުގެ މަޖިލިސް މެންބަރުންނާއި އޭރާއި މިހާރު ދައުލަތުގެ އިސް މަޤާމުތަކުގައި ތިބި މީހުން ހިމެނެއެވެ. އަދި މި މީހުން މަޤާމުން ދުރުކުރުމަށް ހުށަހެޅުމަށް ކޮމިޓީގައި ވަނީ މަޝްވަރާ ކޮށްފައެވެ.