ހަރުކަށި ފިކުރަށް ނިސްބަތްވާ ބަޔަކު ޓެރަރިސްޓް ހަމަލާއެއް ދޭން ރާވާކަމުގެ ތުހުމަތުކޮށް މިދިޔަ ބުރާސްފަތި ދުވަހު ހައްޔަރުކުރި ތިން މީހުންގެ ބަންދަށް 15 ދުވަސް ކްރިމިނަލް ކޯޓުން އިތުރުކޮށްފިއެވެ.

ފުލުހުންނާއި ސިފައިިން ގުޅިގެން ރާއްޖޭގައި ކުރިއަށް ގެންދާ ޚާއްސަ އޮޕަރޭޝަނުގެ ދަށުން މާލެއިން މިދިޔަ ބުރާސްފަތި ދުވަހު ވަނީ އިތުރު ތިން މީހަކު ހައްޔަރުކޮށްފައެވެ. މި ތިން މީހުން އިތުރު 15 ދުވަހު ބަންދުގައި ބައިތިއްބައިގެން ތަހުޤީޤު ކުރިއަށް ގެންދިއުމުގެ ހުއްދަ ކްރިމިނަލް ކޯޓުން އިއްޔެ ވަނީ ދީފަ އެވެ.

މި މީހުން ހައްޔާރުކުރީ, ދީނީ ހަރުކަށި ފިކުރުގެ ބަޔަކާއެކު ރާއްޖޭގެ ގައުމީ ސަލާމަތަށް ނުރައްކާވާ ފަދަ ހަމަލާއެއް ރާވަމުންދާ ކަމުގެ ތުހުމަތުގައެވެ. އެކަމުގައި އިތުރު ބައެއްގެ ބައިވެރިވުން އޮތް ކަމަށްވެސް ފުލުހުން ތުހުމަތުކުރެއެވެ. މި މައްސަލައިގެ ތަފުސީލެއް ފުލުހުން އަދި ހާމައެއް ނުކުރެއެވެ.

މީގެ އިތުރުން ޓެރަރިސްޓް ޖަމާއަތަކަށް ތާއީދު ކުރުމާއި ޖިހާދު ނަމުގައި ހަނގުރާމަ އަށް މީހުން ފޮނުވުމާއި ވަކިިން ޖަމާއަތް ހަދައިގެން ނަމާދު ކުރުމާއި ދީނީ ހަރުކަށި ފިކުރު ފަތުރާ ކްލާސްތަކެއް ހިންގުން ފަދަ ތުހުމަތުތައް ވެސް އެ މީހުންގެ މައްޗަށްކުރެ އެވެ.

ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދަށް ދިން ޓެރަރިސްޓު ހަމަލާއަށްފަހު ފުލުހުންނާއި ސިފައިން ގުޅިގެން ދަނީ ހަރުކަށި ފިކުރުގެ މީހުން ހޯދުމަށް މުޅި ރާއްޖޭގައި އޮޕަރޭޝަނެއް ހިންގަމުންނެވެ.