ރައީސް މުޙައްމަދު ނަޝީދުއަށް އަމާޒުކޮށް ދިން ހަމަލާގެ ތުހުމަތަށް ހައްޔަރުކޮށްފައިވާ ބައެއް މީހުން ކުށަށް އިއުތިރާފު ވެ, އިއުތިރާފް ބަޔާން ދޭން ބޭނުންވާކަމަށް ޕްރޮސެކިއުޓަރ ޖެނެރަލް ހާމަކޮށްފިއެވެ.

މިރޭ ބޭއްވި ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް އަލްއުސްތާޛު ހުސެއިން ޝަމީމް ވިދާޅުވީ ހައްޔަރުކޮށްފައިވާ މީހުންގެ ތެރެއިން 2 މީހަކު އިއުތިރާފު ބަޔާން ދޭން ބޭނުންވެގެން އެދިފައިވާ ކަމަށެވެ. ނަމަވެސް އެކަމަށް އަދި ވަކިގޮތެއް ނުނިންމަވާ ކަމަށް ޕީޖީ ޝަމީމް ވިދާޅުވިއެވެ. ޝަމީމް އިތުރަށް ވިދާޅުވީ އިއުތިރާފް ބަޔާން ނެގުމަށް އަމަލުކުރާނެ އުސޫލުގެ ތަފުސީލާއި, ބަޔާން ނެގުމާ މެދު ނިންމާ ގޮތުގެ ތަފުސީލު ޕީޖީ އޮފީހުން ހާމަކުރާނެ ކަމަށެވެ.

އިއުތިރާފު ބަޔާން ދޭން ބޭނުންވެގެން އެދިފައިވަނީ ކޮން ބައެއްކަން ޕީޖީއާއި ފުލުހުން ހާމައެއް ނުކުރެއެވެ. ނަމަވެސް ހަމަލާ ދިނުމުގައި އެންމެ އިސްކޮށް އުޅުނު އަދުހަމް ހަމަލާ ދިންކަމަށް އެއްބަސްވެފައިވާ ކަމަށް މައުލޫމާތު ލިބިފައިވެއެވެ.

ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން 10 މީހުން ފުލުހުންގެ ހައްޔަރުގައި އެބަތިއްބެއެވެ. އޭގެ ތެރޭގައި ހިމެނޭ 4 މީހުންނަށް ދައުވާކުރަން ވަނީ ފޮނުވާފައެވެ. ދައުވާކުރަން ފޮނުވާފައިވަނީ ފުރަތަމަ ހައްޔަރުކުރި އަހުމަދު އަދުހަމް އާއި މުޖާޒް އަހްމަދުއާއި ތަހުމީން އަހްމަދުގެ އިތުރުން އަހުމަދު ފާތިހުގެ މައްޗަށެވެ.