މިދިޔަ ޖޫން މަހު 13 އަހަރުގެ ކުއްޖަކު ރަހުމުކުޑަގޮތަކަށް މަރާލުމަށްފަހު ފޮށްޓަކަށް ލައި ހުޅުމާލެ ފަޅުތެރެއަށް އެއްލާލާފައިއޮތްވާ ފެނުނު މައްސަލާއާ ގުޅިގެން ދެ މީހެއްގެ މައްޗަށް ދައުވާކުރަން ޕްރޮސިކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފިއެވެ.

ޕްރޮސިކިއުޓަރ ޖެނެރަލް ހުސެއިން ޝަމީމް މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ދައުވާ ކުރަން ނިންމީ ނ. ލަންދޫ، ބަގީޗާގޭ އުމުރުން 27 އަހަރުގެ އިބްރާހިމް ޒިހާން އާއި މި މައްސަލާގައި ހައްޔަރުކޮށްފައިވާ އުމުރުން 17 އަހަރުގެ ކުއްޖާގެ މައްޗަށެވެ. ޒިހާންގެ މައްޗަށް ހަތް ބާވަތެއްގެ 13 ދައުވާއެއް އުފުލާފައިވާއިރު ކުށް ސާބިތުވެއްޖެ ނަމަ ގާތްގަނޑަކަށް 100 އަހަރުގެ ޖަލު ހުކުމެއް އަންނާނެ ކަމަށް ޝަމީމް ވިދާޅުވިއެވެ.

ޒިހާންގެ މައްޗަށް އުފުލި ދައުވާތަކުގެ ތެރޭގައި ގަސްތުގައި މީހަކު މެރުމުގެ ދައުވާއާއި ޖިންސީ ނިޔަތެއް އޮވެގެން އަތްލުމުގެ ފަސް ދައުވާއާއި މަސްތުވާތަކެތި ދީގެން ޖިންސީ އަމަލު ހިންގަން އުޅުނު ކަމުގެ ދައުވާއާއި ކުޑަކުއްޖަކު ގްރޫމްކުރުމުގެ ދައުވާއާއި މައްޔިތާގެ ބޭނުން ނަހަމަގޮތުގައި ހިފުމުގެ ދައުވާއާއި ހުއްދަ ނޫން ގޮތެއްގައި ހިފެހެއްޓުމުގެ ދައުވާއާއި ޖިނާއީ ކުށެއްގައި ކުޑަކުއްޖަކު ބޭނުންކުރުމުގެ ދައުވާއާއި ކުޑަކުދިންނަށް ޖިންސީ ގޯނާކުރުމުގެ އިތުރު ދައުވާތައް ހިމެނެއެވެ.

ޕީޖީ ހުސެއިން ޝަމީމް ނޫސްވެރިންނާ ބައްދަލުކުރައްވަނީ

17 އަހަރުގެ ކުއްޖާގެ މައްޗަށް އުފުލި ދައުވާ ތަކުގެ ތެރޭގައި ގަސްތުގައި މީހަކު މެރުމުގެ ދައުވާއާއި ހުއްދަ ނޫން ގޮތެއްގައި ހިފެހެއްޓުމުގެ ދައުވާއާއި މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ ހިމެނެއެވެ.

ދައުވާ ކުރަން ބޭނުންވާ ހެކިތައް ލިބިފައިވާ ކަަމަށާއި ޕޯސްޓްމޯޓަމްގެ ވަގުތީ ރިޕޯޓުން ލިބުނު މައުލޫމާތު ވެސް ބޭނުންކުރާނެ ކަމަށް ޕީޖީން ވިދާޅުވިއެވެ.

އެކުއްޖާގެ މަރާ ގުޅިގެން ބަލަން ޖެހޭ އިތުރުކަންކަން ބެލުމަށް، ޕޯސްޓް މޯޓަމް ހެދުމަށް ފޮނުވާފައިވަނީ މި ޖުލައި 5 ވަނަ ދުވަހުއެވެ.

ކުއްޖާ މަރާލުމަށްފަހު އެއްލާލާފައި އޮއްވާ ފެނުނީ މިދިަޔަ ޖޫން މަހުގެ 23 ވީ އަންގާރަ ދުވަހުގެ ދަންވަރުގެ ވަގުތެއްގައެވެ.