ރ. އަލިފުށީގެ ފަޅު ހިއްކައިގެން ޓޫރިސްޓު ރިސޯޓެއް ތަރައްގީކުރަން އަންނަ މަހު ހުޅުވާލާނެ ކަމަށް މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް މިއަދު ވިދާޅުވެއްޖެ އެވެ.

އިނގުރައިދޫ ދާއިރާގެ މެންބަރު ލިޔުމުން ކުރެއްވި ސުވާލަލަށް މިނިސްޓަރ ލިޔުމުން މަޖިލީހަށް ފޮނުއްވި ޖަވާބުގައި ވިދާޅުވީ އަލިފުށީ ފަޅުން ހިއްކަން ހަމަޖެހިފައިވާ 10 ހެކްޓަރުގެ ބިމާއެކު އެރަށާއި އެއްފަޅެއްގައި އޮންނަ އެއްތިގިލީގައި ރިސޯޓެއް ތަރައްޤީ ކުރުމަށް އަންނަ އޮކްޓޯބަރު 25 ގައި ހުޅުވާލާނެކަމަށެވެ.

ރިޒޯޓުގެ މަސައްކަތް ފެށޭނެ ތާރީހު ސާފުކުރުމަށް، މެމްބަރު ހަސަން އަހްމަދު ލިޔުމުން ފޮނުއްވި ސުވާލަށް މިނިސްޓަރު ދެއްވި ޖަވާބުގައި ތަފުސީލެއް ހަމަނުއްވާފައެއް ނުވެއެވެ. ހަމައެކަނި ވިދާޅުވީ ރިސޯޓުގެ ބީލަން އަންނަ މަހު ހުޅުވާލެވޭނެ ކަމަށެވެ.

އަލިފުށީގައި ރިސޯޓެއް ތަރައްޤީ ކުރަން ނިންމާފައިވާއިރު، އެއްތިގިލީގައި ޑޮމެސްޓިކް އެއަރޕޯޓެއް ތަރައްގީކުރުމުގެ މަސައްކަތް ވަނީ އެމްޓީސީސީއާ ހަވާލުކޮށްފައެވެ. ސަރުކާރުން ކުރިން ވައުދުވެފައިވާ ގޮތާ ހިިލާފަށް އަލިފުށީގައި އެއަރޕޯޓު އަޅަން ނިންމުމުން އެ އަތޮޅުގެ ރަށްތަކުގެ މެދުގައިވަނީ ވަރަށް ބޮޑަށް ހިޔާލު ތަފާތުވެފައެވެ.

ރ. އަތޮޅުގެ އާބާދީ ބޮޑު އަދި ރިސޯޓުތައް ގިނަ ސަރަހައްދުގައި އެއަރޕޯޓު އަޅަން ކުރިން ސަރުކާރު ވެފައިވާ ވައުދާ ހިލާފުވުމުން، އެ އަތޮޅު ރައްޔިތުން ދަނީ ސަރުކާރަށް ފާޑު ކިޔަމުންނެވެ. ބައެއް ރައްޔިތުން ސޯޝަލް މީޑިއާގައި ބުނެފައިވަނީ އެއަރޕޯޓު އަލިފުއްޓަށް ބަދަލުކުރަން ނިންމީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްގެ ޅިޔަނު އަދި އަލިފުށީ ދާއިރާގެ މެންބަރު މުޙައްމަދު ރަޝީދު ޙުސައިންގެ ނުފޫޒުންނެވެ.

އެއަރޕޯޓުގެ މައްސަލަ ހޫނުވެފައިވާއިރު، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްގެ ދެކަނބަލުން ރ. އަތޮޅަށް ކުރައްވާ ދަތުރުފުޅެއްގައި މިއަދު ވަނީ ފުރާވަޑައިގެންފައެވެ. ނަމަވެސް އެންމެ ބޮޑަށް މައްސަލަ ހޫނުވެފައިވާ ރަށްރަށަށް ވަޑައިގަތުމަށް ހަމަޖެހިފައެއް ނުވެއެވެ.