ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސައިން ވަހީދު އަވަހާރަވެއްޖެއެވެ.

ހުސެއިން އަވަހާރަވީ ރޭ ދަންވަރު 1:25 ހާއިރު އޭޑީކޭ ހޮސްޕިޓަލްގައި ފަރުވާ ހޯއްދަވަމުން ދަނިކޮށެވެ. މެމްބަރު ހުސެއިން ގެންދެވީ ގިނަ ދުވަސްތަކެއް ވަންދެން ކެންސަރު ބަލީގެ އާލާސްކަންފުޅަށް ފަރުވާ ހޯއްދަވަމުންނެވެ.

ހާލުކޮޅު ސީރިއަސްވެގެން މެމްބަރު ވަނީ މަޖިލީހާއި ދުރުގައި ފަރުވާ ހޯއްދެވުމަށް އަހަރެއްހާ ދުވަސް ހޭދަކުރައްވާފައެވެ. އެއަށްފަހު އަލުން މަޖިލީހުގެ ޖަލްސާއަކަށް ވަޑައިގެންނެވީ މިއަހަރުގެ މާރޗް މަހުގެ 29 ވަނަ ދުވަހުގައެވެ. އަދި 30 ވަނަ ދުވަހު ބޭއްވި ޖަލްސާގައި އޭނާ ވަނީ ހެޔޮދުޢާ ކޮށްދެއްވާ ހާލުބަލަން ގުޅުއްވި މެންބަރުންނަށާއި ރައްޔިތުންނަށް ޝުކުރު އަދާކުރައްވާފައެވެ.

ހުސައިންގެ ޖަނާޒާ މިއަދު މެންދުރު ނަމާދަށްފަހު ވަނީ ބާއްވާފައެވެ. ކަށު ނަމާދާއި ޖަނާޒާގައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހްއާއި ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު ބައިވެރިވެވަޑައިގެންނެވިއެވެ.

19 ވަނަ މަޖިލީހުގެ އިތުރުން 17 ވަނަ މަޖިލީހުގެ މެންބަރުކަންވެސް ހުސެއިން ވަނީ ކުރައްވާފައެވެ.