ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން މިމަހުގެ 14 ވަނަ ދުވަހު ޓްރާންސްޕޯޓް މިނިސްޓަރު އާއިޝަތު ނަހުލާއާ ބައްދަލުކުރުމަށް ތާވަލުކުރި ކޮމިޓީ ބައްދަލުވުމަށް ގަޑިއަށް ވަޑައިނުގެންނެވުނީ މައްސަރު ކަންތައް ދިމާވުމުން ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.

އެ ކަމަނާ މިހެން ވިދާޅުވީ އެ ދުވަހުގެ ބައްދަލުވުމަށް އެ ކަމަނާ ވަޑައިނުގަންނަވާ ކަމަށް ނިންމާ ކޮމިޓީ ބައްދަލުވުން ކެންސަލްކޮށް އެކަމާ މެންބަރުން ނުރުހުން ފާޅުކޮށްފައިވަނިކޮށް, މިއަދު ބޭއްވި ކޮމިޓީ ބައްދަލުވުމަށް ވަޑައިގެން ވާހަކަ ދައްކަވަމުންނެވެ.

މިއަދުގެ ކޮމިޓީ ބައްދަލުވުން ނިންމާލުމުގެ ކުރިން އެ ކަމަނާ ވަނީ އެ ދުވަހުގެ ބައްދަލުވުމަށް ގަޑިއަށް ވަޑައިނުގެންނެވުނު ސަބަބު ވިދާޅުވެ, މެންބަރުންގެ ކިބައިން މާފަށް އެދިފައެވެ.

"ދިމާވި ހާލަތާއި ގުޅިގެން ކުޑަކޮށް ލަސް ވެދާނެ ވާހަކަ މިތަނަށް އަންގާފައި އޮއްވާ މަޖިލީސް ކެންސަލް ކޮށްލިކަން މިތަނަށް އައިސް ހުއްޓާ އެނގުނީ. ކުޑަކޮށް ނަމަވެސް މަޖިލީހަށް ހާޒިރުވުމުގައި ލަސްވި ކަމަށްޓަކައި ހުރިހާ އިއްޒަތްތެރި މެންބަރުންގެ ކިބައިން ނިހާޔަތަށް މާފަށް އެދެން." މިނިސްޓަރ ވިދާޅުވިއެވެ.

މީގެ އިތުރުން ވަޒީރެއްގެ ކުރިން އެކަމަނާ އަކީވެސް އިންސާނެއް ކަމަށާއި އަންހެނަކަށް ވީތީ ދިމާވެދާނެ ހާލަތެއް އޮވެ ދާނެކަން ފާހަގަކުރެއްވިއެވެ.

"އެހެންވީމަ އިހުތިރާމް ކުޑަކުރުމުގެ ގޮތުން މަޖިލީހަށް ލަހުން އައީއެއް ނޫން" ނަހުލާ ވިދާޅުވިއެވެ.

ނަހުލާ މިހެން ވިދާޅުވިއިރު މީގެ ކުރީންވެސް ކޮމެޓީއަށް ހާޒިރުނުވެގެން ބައެއް ކޮމިޓީތަކުން އެތައް ފަހަރަކު އެކަމަނާއަށް ނޯޓިސް ފޮނުވާފައިވެއެވެ. އެގޮތުން 2020 ވަނަ އަހަރު ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ހާޒިރުވާން ތަކުރާރުކޮށް އެންގުމުންވެސް ވަޑައިނުގަންނަވައެވެ. އަދި ކޮމިޓީން ބޭއްވި އޮންލައިން ބައްދަލުވުންތަކުގައިވެސް ބައިވެރިވެވަޑައި ނުގަންނަވައެވެ.