ޕީއެސްއެމްއަށް ތުހުމަތު ކުރާ 100 މިލިއަން ރުފިޔާގެ ޚިޔާނާތުގެ މައްސަލައާ ގުޅިގެން ޕީއެސްއެމްގެ ބޯޑު މެންބަރުންނާއި ކުރީގެ އިންޓާނަލް އޮޑިޓަރު ރައްޔިތުން މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީ (އެސްއޯއީ) ކޮމިޓީއަށް ހާޒިރުކުރަން ނިންމައިފިއެވެ.

ޕީއެސްއެމްގެ ހިޔާނާތުގެ މައްސަލަ މަޖިލީހުން ބަލަން ނިންމީ މިދިޔަ ޖޫން މަހުގައެވެ. އަދި އެ ފަހަރު ކޮމިޓީން ވަނީ އެކަމާ ގުޅޭ ގޮތުން ލިޔުންތައް ފޮނުވުމަށް ޕީއެސްއެމްއަށް އަންގާފައެވެ.

މިއަދު ބޭއްވި ކޮމިޓީން ވަނީ ޕީއެސްއެމްގެ ސިޓީ އިއްވާ ޕީއެސްއެމުން ހުށަހަޅާފައިވާ ލިޔުންތަކަށް ބެލުމަށްފަހު ކުންފުނީގެ ބޯޑު މެންބަރުން ކޮމިޓީއަށް ހާޒިރުކުރުމަށް ނިންމާފައެވެ. އަދި ޕީއެސްއެމްއިން ވަކިކޮށްފައިވާ އެތަނުގެ ކުރީގެ އިންޓާނަލް އޮޑިޓަރ އަހުމަދު ފަޒީލްވެސް ކޮމިޓީއަށް ހާޒިރުކުރުމަށް ކޮމިޓީން ނިންމިއެވެ.

ޕީއެސްއެމްގެ ހިޔާނާތުގެ މައްސަލަ ފެންމަތިވީ އިންޓާނަލް އޮޑިޓަރ ފަޒީލް މަގާމުން ވަކިކޮށް, އެ މަސައްކަތް އައުޓްސޯސް ކުރުމަށް ޕީއެސްއެމްއިން މަސައްކަތް ފެށި ހިސާބުންނެވެ. އޭނާ މަގާމުން ވަކިކުރީ މަސައްކަތް ނުކުރެވޭ ކަމަށް ބުނެ އޯޑިޓް ޔުނިޓު އުވާލުމަށްފަހުގައެވެ.

ނަމަވެސް އިންޓާނަލް އޮޑިޓަރ އަހުމަދު ފަޒީލް މީގެ ކުރިން މީޑިއާގައި ވިދާޅުވީ އިންޓާނަލް އޯޑިޓް ޔުނިޓް އުވާލީ 100 މިލިއަންގެ ހިޔާނާތް ފޮރުވަން ކަމަށެވެ. އަދި އެނާ ތައްޔާރުކޮށް ބޯޑާއި މެނޭޖްމަންޓުގެ ސަމާލުކަމަށް ގެނައި އެއްވެސް ކަމެއްގައި ފިޔަވަޅު އަޅާފައިނުވާކަން ފާހަގަކޮށްފައިވެއެވެ.

އޯޑިޓް ޔުނިޓުން ތައްޔާރު ކުރި އޯޑިޓް ރިޕޯޓްތަކުގައި ވަނީ އެތަނުގެ ގިނަ ވެރިން ހިންގި ކަމަށް ތުހުމަތުކުރާ ބޮޑެތި ހިޔާނާތުގެ މައުލޫމާތު ހިމަނާ އެމީހުންނާ މެދު ފިޔަވަޅު އެޅުމަށް ގޮވާލާފައެވެ. ނަމަވެސް މެނޭޖްމަންޓުން ވެރިންނަށް ފިޔަވަޅު އެޅުމަށް ވަނީ ދެކޮޅު ހަދާފައެވެ.