މި އަހަރުގެ ޖެނުއަރީ މަހު މޯލްޑިވިއަން އިން ގަތް 3 ބޯޓުގެ ތެރެއިން އެއް ބޯޓު ފްރާންސްގެ ޓުލޫޒްއިން ފެނިއްޖެއެވެ.

މޯލްޑިވިއަން އިން އޯޑަރުކުރީ އޭޓީއާރު 72ގެ މަރުކާގެ ދެ ބޯޓާއި އޭޓީއާރު 42ގެ މަރުކާގެ އެއް ބޯޓެވެ. ފްރާންސްގެ ޓުލޫޒްއިން ފެނުނީ މިތަނުން އޭޓީއާރު 72 މަރުކާގެ ދެ ބޯޓުގެ ތެރެއިން ބޯޓެކެވެ.

ފްރާންސްގެ އޭވިއޭޝަނާ ގުޅޭ މައުލޫމާތު ގެނެސްދޭ ޔޫރޯ ސްޕޮޓްއިން މި ބޯޓުގެ ފޮޓޯ ނަގާފައިވަނީ ބޯޓު މޯލްޑިވިއަންގެ ހާއްސަ ޕެއިންޓްކޮށްގެން ނެރުނު ތަނުންނެވެ.

މޯޑިވިއަން އިން އޭޓީއާރުގެ ބޯޓު ގަންނަން ނިންމީ، މިހާރު ބޭނުންކުރާ ޑޭޝް-8 މަރުކާގެ ބޯޓުތައް ގިނަ ދުވަސްވެ، ބޯޓުތަކަށް ބޭނުންވާ ސްޕެއާ ޕާޓްސް ނުލިބޭތީކަމަށް މޯލްޑިވިއަން އިން ބުނެއެވެ.

މޯޑިވިއަން އިން ގަތް އެޓީއާރުގެ 3 ބޯޓު އަންނަ ޑިސެންބަރުގައި ރާއްޖެ ގެނައުމަށްވަނީ ހަމަޖެހިފައެވެ.