ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދުއާ އާންމުން ސުވާލުކުރުމަށް މަޖިލީހުގެ އިދާރައިން ކުރިއަށް ގެންދާ އާސްކްސްޕީކާ ޕްރޮގްރާމްގެ 6 ވަނަ އެޕިސޯޑް އަންނަ ބުރާސްފަތި ދުވަހު އޮންނާނެއެވެ.

މި ފަހަރުގެ ޕްރޮގްރާމް މި ބާއްވަނީ ރައްޔިތުންގެ މަޖިލީހުގެ މެންބަރުންގެ ފާޑުކިޔުމާއި ބޮޑެތި ތުހުމަތުތައް ރައީސް ނަޝީދުއަށް އަމާޒުވެފައިވާ ދަނޑިވަޅެއްގައެވެ. އެގޮތުން ސަރުކާރަށް ތާއީދުކުރާ ބައެއް މެންބަރުން ދަނީ މަޖިލީހުގެ ޖަލްސާތަކާއި ސޯޝަލް މީޑިއާގައި ރައީސް ނަޝީދަށް އަމާޒުކޮށް ވަރަށް ބޮޑަށް ފާޑުކިޔަމުންނެވެ.

އާސްކް ސްޕީކާ ޕްރޮގްރާމަކީ މަޖިލީހުގެ ރައީސާ ރައްޔިތުން ކުރަން ބޭނުންވާ ސުވާލުކުރުމަށް ފުރުސަތު ދިނުމަށް ބާއްވާ ޕްރޮގްރާމެކެވެ. މިހާތަނަށް މީގެ 5 ޕްރޮގްރާމް ބާއްވާފައިވާއިރު, މި ޕްރޮގްރާމްތަކުގައި ރައީސް މުޙައްމަދު ނަޝީދުވަނީ އެކި ދާއިރާތަކުން އާންމުން ކުރި ސުވާލުތަކަށް ވަގުތުން ޖަވާބު ދެއްވާފައެވެ.

އެހެން އަހަރުތަކާ ހިލާފަށް މިފަހަރުގެ ޕްރޮގްރާމް އޮންނާނީ 1 ޑިސެންބަރު 2022 ގެ މެންދުރުފަހު 2:15 ގައެވެ. މަޖިލީހުގެ އިދާރާއިން ވިދާޅުވީ ޕްރޮގްރާމްގެ ގަޑި ބަދަލުކުރީ އެރޭ ވޯލްޑްކަޕްގެ އާޖެންޓީނާ މެޗް އޮންނާތީއެވެ. އަދި މަޖިލީހުގެ އިދާރާގައި ބާއްވަނީ ޕީއެސްއެމްގެ ބޮޑު ސްޓޯޑިއޯ ވޯލްޑްކަޕްގެ ޝޯއަށް ތައްޔާރުކޮށްފައިވާތީ, އެތަނުގައި ޕްރޮގްރާމް ބޭއްވުމަށް ދަތިވާތީއެވެ.

"މިފަހަރު އޮންނާނީ މަޖިލީހުގެ އިދާރާގައި. ޕީއެސްއެމްއާއި މަޖިލީސް ގުޅިގެން މި ފަހަރުވެސް ބާއްވާނީ. ގަޑި ބަދަލުކުރީ އާޖެންޓީނާގެ މެޗް އެރޭ އޮވެފަ, އަދި ސްޓޫޑިއޯވެސް ހުރީ ވޯލްޑް ކަޕަށް ތައްޔާރުކޮށްފަ. އެހެންވީމަ, ހުރިހާ ގޮތަކުން ފަސޭހަވާނެ އިދާރާގައި ބޭއްވީމަ. އަދި އާންމުންނަށްވެސް ޕްރޮގްރާމްގެ އޯޑިއެންސްގައި ބައިވެރިވުމުގެ ޖާގަ އޮންނާނެ" މަޖިލީހުގެ ކޮމިއުނިކޭޝަން ޑިރެކްޓަރ, ޙަސަން ޒިޔާއު ވިދާޅުވިއެވެ.

މި ޕްރޮގްރާމަށް ޓެކްސްޓް ސުވާލު, ވައިބާ ވަޓްސްއެޕް އަދި ޓެލެގްރާމް މެދުވެރިކޮށް ފޮނުވޭނެ ކަމަށް މަޖިލީހުން ވިދާޅުވިއެވެ. އަދި ވީޑިއޯ ސުވާލުތަކާއި ލައިވްކޮށް ފޯނުން ނުވަތަ ޕްރޮގްރާމަށް ވަޑައިގެން ސުވާލު ކުރުމުގެ ފުރުސަތުވެސް ވަނީ ހުޅުވާލާފައެވެ. ޓެކްސްޓް ސުވާލުތައް ފޮނުވާނީ މަޖިލީހުގެ މީޑިއާ ނަންބަރު 7234566 އަށެވެ.

މި ޕްރޮގްރާމަކީ 2019 ވަނަ އަހަރުން ފެށިގެން ރައްޔިތުންގެ މަޖިލީހުގެ އިދާރާއިން ކުރިއަށް ގެންދާ ލައިވް ޕްރޮގްރާމެކެވެ.