އީމާން (އަސްލު ނަމެއް ނޫން), އޭނާގެ އަލަތު ދަރިފުޅު ވިހެއުމުގެ ކުރިން ބޭނުންވީ ފޮޓޯ ޝޫޓެއް ޖައްސާ, ވިހަން ކައިރިވުމުން އެ ފޮޓޯތައް މެދުވެރިކޮށް ދަރިފުޅުގެ ޖިންސް އާއިލާއާއި ރައްޓެހިންނާ ހިއްސާކުރާށެވެ. ނަމަވެސް ކަންވީ އެހެނެއް ނޫނެެވެ. ފޮޓޯ ޝޫޓަށްފަހު އެ ދެމަރިންނަށް ގެއާހިސާބަށް ނުދެވެނީސް އެމީހުން ހަޔާކުރި ފޮޓޯގްރަފަރު އަހުމަދު މައޭޝް އެ ފޮޓޯތައް އޭނާގެ ސޯޝަލް މީޑިއާއަށްލާ, ދަރިފުޅުގެ ޖީންސްވެސް އާންމުކޮށްލީއެވެ.

މިއީ ރާއްޖޭގައި މިހާރު ވަރަށް އާންމު ކަމެކެވެ. ފޮޓޯގްރަފަރުންނާއި ވީޑިއޯގްރަފަރުން ނަގާ ފޮޓޯތަކާއި ވީޑިއޯތައް ކަސްޓަމަރުގެ ހުއްދަނެތި ވިޔަފާރި ޕްރޮމޯޓްކުރުމަށް ބޭނުންކުރާ މައްސަލަ ވަނީ އިންތިހާއަށް ބޮޑުވެފައެވެ. އަދި މިފަދަ މައްސަލަތަކުގެ ޝަކުވާކުރާނެ ގޮތެއްވެސް ގިނަ މީހުންނަށް ނުވެސް އެނގެއެވެ.

އީމާން ތަކުރާރުކޮށް, އެމީހުންގެ މޫނު ފެންނަ ގޮތަށް އަދި ދަރިފުޅުގެ ޖިންސް އޭނގޭ ގޮތަށް ފޮޓޯ އާންމުނުކުރުމަށް ފޮޓޯގްރަފަރު އަހުމަދު މައޭޝް ކައިރިން އެދުނުކަމަށް ފޭސްބުކްގައި ހިއްސާކުރި ޕޯސްޓުގައި ލިޔެފައިވެއެވެ. ނަމަވެސް ފޮޓޯގްރަފަރު އެކަމަކަށް އެއްވެސް ސަމާލުކަމެއް ނުދިނެވެ. ކަސްޓަމަރުގެ ހައްގު ހިމާޔަތްކުރުމުގެ ބަދަލުުގައި ފޮޓޯގްރަފަރަށް މުހިއްމު ވީ އެ ފޮޓޯތައް ސޯޝަލް މީޑިއާއަށްލާ އޭނާގެ ވިޔަފާރި ޕްރޮމޯޓްކުރުމެވެ.

ފޮޓޯތައް އާންމުކުރުމުން އެކަމުގެ ޝަކުވާވެސް އީމާން ކުރިއެވެ. އިތުރު ފޮޓޯތައް އާންމުނުކުރުމަށާއި އެކަމާ ދެކޮޅުކަން ހާމަކޮށް މެސެޖުވެސް ކުރިއެވެ. ނަމަވެސް ފޮޓޯގްރަފަރު އަހުމަދު މައޭޝް ހެދީ ދެކޮޅެވެ. އޭނާ ބުނީ އޭނާ ނެގި ފޮޓޯތައް ސޯޝަލް މީޑިއާއަށް ލުމަކީ އޭނާގެ ހައްގެއްކަމަށް އަދި ފޮޓޯތައް ނުލާން ބޭނުންނަމަ ޕްރައިވަސީ ފީއެއް ދައްކަންޖެހޭ ކަމަށެވެ.

"ފޮޓޯގްރަފަރުންގެ ޕޯޓްފޯލިއޯގައި އޮންލައިންކޮށް އެމީހުން ނަގާ ފޮޓޯތައް އާންމުކުރުމަކީ ފޮޓޯގްރަފަރުންގެ ހައްގެއް" މައޭޝް އީމާންއަށް ޖަވާބު ދިނެވެ.

ފޮޓޯ އާންމުނުކުރުމަށް އެދުމުން ދެންވެސް އޭނާ ދެއްކީ އޭނާގެ ހައްގުގެ ވާހަކައެވެ.

"ފަހުރުވެރި ކޮންޓެންޓް ކްރިއޭޓާއެއްގެ ހައިސިއްޔަތުން އަދި އަހަރެން ނަގާ ފޮޓޯތަކުގެ ކޮޕީރައިޓް ހޯލްޑާއެއްގެ ހައިސިއްޔަތުން މިނިވަން ކަމާއެކު އަހަރެންގެ މަސައްކަތް މީހުންނަށް ދެއްކުމަކީ ވަރަށް މުހިއްމު ކަމެއް" މައޭޝް ބުންޏެވެ.

އޭނާ އެހެން ބުންޏަސް ހަގީގަތުގައި އަގު ދީގެން ހޯދާ ހިދުމަތެއް ނުވަތަ މުދަލެއްގެ މިލްކުވެރި ފަރާތަކީ އެ ހިދުމަތެއް ނުވަތަ މުދަލެއް ގަންނަ ފަރާތެވެ. އެމުދަލެއް ނުވަތަ ހިދުމަތެއްގެ ހުރިހާ ރައިޓެއްވެސް ލިބޭނީ ގަންނަ ފަރާތަށެވެ. އެހެން ކަމުން މިހާލަތުގައި އީމާންގެ ހުއްދަނެތި ފޮޓޯގްރަފަރަށް ހަމަ އެންމެ ފޮޓޯއެއްވެސް އާންމު ނުކުރެވޭނެއެވެ. އަދި ފޮޓޯ އާންމުކުރުމުން އެ ގެއްލުނީ ހިދުމަތް ހޯދި ފަރާތުގެ ހައްގެވެ.

އީމާން އޭނާގެ ހިތި ތަޖުރިބާ ފޭސްބުކްގައި ހިއްސާ ކުރަމުން ބުނީ މިއީ މިހާތަނަށް ދިމާވި އެންމެ ގޯސް ފޮޓޯގްރަފަރުކަމަށެވެ. ފޮޓޯތައް އާންމުނުކުރުމަށް އެދި މެސެޖް ކުރުމުން މައޭޝް ވަނީ އީމާން ސޯޝަލް މީޑިއާއިން ބްލޮކް ކޮށްފައެވެ. އަދި އޭގެފަހުން އޭނާގެ އަންހެން ކޮއްކޮ އަށްވެސް އިންސްޓެގްރާމުން މައޭޝް މެސެޖްކޮށްފައިވާ ކަމަށް ބުނެ އެ މެސެޖުގެ ސްކްރީން ޝޮޓްވެސް އީމާން ހިއްސާކޮށްފައިވެއެވެ.

މިހާލަތުގައި ހަދާނީ ކިހިނެތް؟ ޝަކުވާކުރާނީ ކޮންތާކު؟

ރައްޔިތުންގެ މަޖިލީހުން 2020 ވަނަ އަހަރު ފާސްކުރި ގާނޫނުތަކުގެ ތެރޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނެއް އޮވެއެވެ. މިއީ ދިވެހިރާއްޖޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ހައްގުތައް ކަނޑައަޅައި، އެ ހައްގުތައް ހިމާޔަތްކުރުމާއި، މުދާ ވިއްކާ ނުވަތަ ޚިދުމަތް ފޯރުކޮށްދޭ ފަރާތްތަކުގެ ޒިންމާތައް ކަނޑައަޅައި، މުދާ ވިއްކުމުގައި އަދި ޚިދުމަތް ފޯރުކޮށްދިނުމުގައި ހުންނަންޖެހޭނެ މިންގަނޑުތައް ކަނޑައަޅައި، އެ މިންގަނޑުތަކާ ހިލާފުވާ ފަރާތްތަކާމެދު ފިޔަވަޅުއެޅުމުގައި އަމަލުކުރާނެ އުސޫލުތައް ބަޔާންކުރުމުގެ ގާނޫނެވެ.

މިގާނޫނުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ކޮންސިއުމާ އޮމްބަޑްސްޕާސަންގެ އޮފީހެއް އުފައްދާ ކޮންސިއުމާ އޮމްބަޑްސްޕާސަނެއް ވަނީ ކަނޑައަޅާފައެވެ. ކޮންސިއުމަރ އޮމްބަޑްސްމަނަކީ މި ޤާނޫނުގެ ދަށުން އުފުލާ ޝަކުވާތައް ބެލުމަށްޓަކައި އައްޔަންކޮށްފައިވާ ފަރާތެކެވެ.

ފޮޓޯގްރަފަރުންގެ މިފަދަ އެހެން މައްސަލައަކާ ގުޅިގެން މީގެ ކުރިން ކޮންސިއުމާ އޮމްބަޑްސްޕާސަން މަރިޔަމް ޝައްމާ އިސްމާޢީލް ސުކުންއަށް ވިދާޅުވީ މިފަދަ މައްސަލަތަކުގެ ހައްލަކީ ޝަކުވާ ހުށަހެޅުމުގެ ފުރުސަތުގެ ބޭނުންކުރުމެވެ. އެގޮތުން ކޮންސިއުމާ އޮމްބަޑްސްޕާސަންގެ އޮފީހާއި އިކޮނޮމިކް މިނިސްޓްރީއަށް ނުވަތަ ސިވިލް ކޯޓަށްވެސް މައްސަލަ ހުށަހެޅޭނެކަން އޭނާ ފާހަގަކުރެއްވިއެވެ.

31 އޯގަސްޓް 2021 ގައި ކޮންސިއުމާ އޮމްބަޑްސްޕާސަންގެ އޮފީސް އުފެއްދި ފަހުން މިހާތަނަށް އެ އޮފީހަށް 8 މައްސަލަ ހުށަހަޅާފައިވެއެވެ. އަދި މީގެ ތެރެއިން 6 މައްސަލަ ބަލާ ގޮތެއް ވަނީ ކަނޑައަޅާފައެވެ.