އާ އަހަރު ފާހަގަކުރުމަށް ރާއްޖޭގެ 79 ރަށެއްގައި މިރޭ ހަވާއަރުވައިފިއެވެ.

ހަވާ އެރުވުމުގެ މަސައްކަތް ކުރާ މޯލްޑިވްސް ނޭޝަނަލް ޑިފެންސް ފޯސްގެ ކުންފުނި ސިފްކޯއިން ބުނީ ހަވާއެރުވީ މީހުން ދިރިއުޅޭ ފަސް ރަށަކާއި 74 ރިސޯޓުގައެވެ. މީގެ ތެރެއިން އެންމެ ގިނައިރު ހަވާއެރުވީ ކުޑަހުރާ ފޯސީޒަންސް ރިސޯޓްގައެވެ. އެ ރިސޯޓުގައި 10 މިނެޓަށް ހަވާއެރުވިއެވެ.

ހަވާއެރުވި މީހުން ދިރިއުޅޭ ރަށްރަށުގެ ތެރޭގައި މާލޭ ސަރަހައްދުން ހުޅުމާލޭ ހިމެނެއެވެ. ހުޅުމާލޭގައި ހަވާއެރުވީ އައު އަހަރުގެ ޝޯ ކުރިއަށްދިޔަ ހުޅުމާލޭ ސިންތެޓިކް ޓްރެކްގައެވެ.