ރައްޔިތުންގެ މަޖިލީހުގެ ތިން އޮފިސަރުން ކަމަށްވާ އަމީންއާންމުއާއި ކައުންސެލް ޖެނެރަލް އަދި ސަރޖަންޓް އެޓް އާމްސްގެ މަގާމްގުގައި މިހާރު ތިބި 3 ބޭފުޅުން އެ މާގާމްތަކުގައި ބޭތިއްބުމަށް ރައްޔިތުންގެ މަޖިލީހުން ފާސްކޮށްފިއެވެ.

މި މައްސަލަ ހުށަހަޅުއްވަމުން މަޖިލީހުގެ ރައީސް ޢަބްދުއްރަޙީމް ވިދާޅުވީ އޭނާ ގަސްތު ކުރައްވަނީ މިދިޔަ 19 ވަނަ މަޖިލީހުގައިވެސް ކަންކުރި ގޮތަށް މިހާރު އެމަގާމްތަކުގައި ތިބި ބޭފުޅުން އަނެއްކާވެސް އެ މަގާމްތަކަށް އައްޔަނުކުރުމަށްކަމަށެވެ. ނަމަވެސް 3 އޮކްޓޯބަރ 2019 ވަނަ ދުވަހު ބޭއްވި މިދިޔަ 19 ވަނަ ރައްޔިތުންގެ މަޖިލީހުގެ 48 ވަނަ ޖަލްސާގައި މަގާމުތަކަށް އެމީހުން އައްޔަންކުރުމުން އެއީ ރައްޔިތުންގެ މަޖިލީހުގެ ގަވާއިދާ ޚިލާފަށް ކޮށްފައިވާކަމެއް ކަމަށްބުނެ އޭރު ރައްޔިތުންގެ މަޖިލީހުގެ ބައެއް މެންބަރުން ވަނީ އެކަމާ ދެކޮޅަށް އަޑު އުފުލާފައެވެ. ނަމަވެސް އޭރު އެމްޑީޕީގެ މެޖޯރިޓީ މަޖިލީހުންވަނީ މެންބަރުންގެ ޚިޔާލަށް ބެލުމެއް ނެތި މަގާމްތަކުގައި ތިބި ތިން މީހުންވެސް އަލުން އެ މަގާމްތަކަށް އައްޔަނުކުރުމަށް ފާސްކޮށްފައެވެ.

އޭރު މެންބަރުން މަޖިލީހުގެ ގަވާއިދާ ޚިލާފަށްކަމަށް ބުނެ އަޑު އުފުލީ މަޖިލީހުގެ ގަވާއިދުގެ 18 ވަނަ މާއްދާއަށް ހަވާލާދީއެވެ. މަޖިލީހުގެ ގަވާއިދުގެ 18 ވަނަ މާއްދާގައި ސާފުކޮށް ބުނެފައިވަނީ އަމީންއާންމުއާއި ކައުންސެލް ޖެނެރަލް އަދި ސަރޖަންޓް އެޓް އާމްސްގެ މަގާމަށް މީހުން އައްޔަނުކުރުމުގައި އެމަގާމްތަކަށް ކުރިމަތިލުމުގެ ފުރުސަތު މަޖިލީހުގެ ރައީސް އާންމުކޮށް ހުޅުވާލާންވާނެކަމަށެވެ. އެހެން ކަމުން މެންބަރުން ދެކެވަޑައިގެންނެވީ މިހާރު ތިބި މީހުންވެސް އެމަގާމްތަކަށް އަލުން އައްޔަނުކުރެވޭނީވެސް އިއުލާން ކުރުމަށްފަހުކަމަށެވެ. ނަމަވެސް 19 ވަނަ މަޖިލީހުންވެސް އަދި މިއަދު 20 ވަނަ މަޖިލީހުންވެސް އެ ތިން މަގާމުގައި މިހާރު ތިބި މީހުން އަނެއްކާވެސް އައްޔަނުކުރަން ފާސްކޮށްފައިވަނީ އިއުލާންކުރުމެއްނެތިއެވެ.

މެންބަރުން ދެކޮޅު ހެދުމުން އޭރު މަޖިލީހުގެ އިދާރާއިން ގަވާއިދު މާނާކުރުމަށްފަހު ބުނީ މިހާރު ތިބި ބޭފުޅުން އައްޔަނުކުރުމަށް އިއުލާންކުރާކަށް ނުޖެހޭނެކަމަށެވެ. ނަމަވެސް އޭރު އިދާރައިން ގަވާއިދު މާނަކުރި ގޮތާމެދު 19 ވަނަ މަޖިލީހުގެ ބައެއް މެންބަރުން ދެކޮޅު ހެއްދެވިއެވެ.

މިހާރު އަމީންއާންމުގެ މަގާމުގައި ހުންނެވީ 18 ވަނަ މަޖިލީހުން އެމަގާމަށް އައްނަޔުކުރި ފާތިމަތު ނިއުޝާއާއި 17 ވަނަ މަޖިލީހުން ކައުންސިލް ޖެނެރަލްގެ މަގާމަށް އައްޔަނުކުރި ފާތިމަތު ފިލްޒާއާއި 19 ވަނަ މަޖިލީހުން މިދިޔަ ފެބްރުއަރީގައި ސާރޖަންޓް އެޓް އާމްސްގެ މަގާމަށް އައްޔަނުކުރި ތޮލްހަަތް ހަސަންއެވެ.