ފިއުލް ސަޕްލައި މޯލްޑިވްސް (އެފްއެސްއެމް)ގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، އެކަމުން ލިބޭ ފައިސާ ލޯންޑަރކުރާކަމަށް ތުހުމަތު ކުރެވޭ މައްސަލައެއް ފުލުހުން ތަހުގީގުކުރަން ފަށައިފިއެވެ.

މިކަމާ ގުޅޭ ގޮތުން މިރޭ އެކްސްގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ކުރެއްވި ޕޯސްޓެއްގައި ވިދާޅުވީ އެފްއެސްއެމްގެ މުވައްޒަފުންތަކެއް އެކުންފުނީގެ ތެލުން ވައްކަންކޮށް، އޭގެއިން ލިބޭފައިސާ ލޯންޑަރކުރަމުންދާކަމަށް ތުހުމަތުކުރެވޭ މައްސަލައެއް ބަލަމުން ދާކަމަށާއި މި މައްސަލާގައި މިހާތަނަށް 10 މީހުންނާއި 2 ގެއެއް އަދި ތެޔޮއުފުލާ 2 ބާޖު ފުލުހުންގެ ޙާއްސަ ޓީމުތަކުން ބަލާ ފާސްކޮށްފައިވާކަމަށެވެ. އަދި މައްސަލައާ ގުޅުން ހުރިކަމަށް ބެލެވޭ އިލެކްޓްރޯނިކް ސާމާނާއި ލިޔެކިޔުން ހޯދާފައިވާކަމަށް އަލީ އިހުސާން ވިދާޅުވިއެވެ.

ވަޒީރު އިތުރަށް ވިދާޅުވީ މި މައްސަލައިގެ ތަހުގީގު ކުރިއަށްދާވަރަކުން މިކަމުގެ މައުލޫމާތު ފުލުހުން ހާމަކުރަމުންދާނެ ކަމަށެވެ. އަދި ވަކި މީހަކު އިސްތިސްނާނުކޮށް ޤާނޫނީ ފިޔަވަޅު އެޅުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަރަށް އިސްކަންދެއްވާކަމެއް ކަމަށްވެސް ވިދާޅުވެފައިވެއެވެ.

އެފްއެސްއެމްގެ މައްސަލައެއް ތަހުގީގުކުރަމުންދާއިރު, މީގެ ކުރިންވެސް އެތަނުގެ ބައެއް މުވައްޒަފުންނާއި އެމްޕީއެލްގެ މުވައްޒަފުންތަކެއް ގުޅިގެން ހިންގި ތެލުގެ ވައްކަމުގެ މައްސަލައެއް ފެންމަތިވެފައިވެއެވެ. އަދި އެ މައްސަލާގައި 3 މީހެއްގެ މައްޗަށް ދަޢުވާކޮށްފައިވެއެވެ.