ވިޒިޓް މޯލްޑިވްސް ކްލަބް (ވީއެމްސީ) އިން 2025 ވަނަ އަހަރުގެ އޭޕްރީލް އަދި މެއި މަހު ބޭއްވުމަށް ހަމަޖެހިފައިވާ ބައިނަލްއަގުވާމީ ސްޕޯޓްސް ފިޝިން (ވާދަވެރި މަސްވެރިކަން) މުބާރާތް "ބުރުނު ބޮމަ" މާދަމާރޭ އިއުލާންކުރުމަށް ނިންމައިފިއެވެ.

އެމްއެމްޕީއާރުސީގެ ރެކްރިއޭޝަން ކްލަބު ކަމަށްވާ ވިޒިޓް މޯލްޑިވްސް ކްލަބް (ވީއެމްސީ) އަކީ ދުނިޔޭގެ އެންމެ މަގުބޫލު މަންޒިލެއްގެ ގޮތުގައި ދިވެހިރާއްޖެ އިޝްތިހާރުކުރުމަށް ފަތުރުވެރިކަމުގެ ސިނާއަތާ ގުޅިގެން މަސައްކަތް ކުރާ އަދި އެއްބައިވަންތަ ފަތުރުވެރިކަމުގެ މުޖުތަމައުއެއް އުފެއްދުމަށްޓަކައި އެކިއެކި ހަރަކާތްތަކުގެ ޒަރިއްޔާއިން ރާއްޖޭގެ ފަތުރުވެރިކަމުގެ ސިނާއަތް ހަރުދަނާ ކުރުމަށް އެމްއެމްޕީއާރުސީގެ މުވައްޒަފުން އިސްނަގައިގެން ހިންގަމުންގެންދާ ކުލަބެކެވެ.

ބުރުނު ބޮމަ އިންތިޒާމުކުރާ ވިޒިޓް މޯލްޑިވްސް ކްލަބުގެ ރައީސް އަޙުމަދު ސާއިފު ވިދާޅުވީ މިހަރަކާތަކީ 2025 ވަނަ އަހަރަށް މިކުލަބުން ކުރިއަށްގެންދިއުމަށް ރާވާފައިވާ އެންމެ ބޮޑު ހަރަކާތްކަމަށެވެ.

"މި މުބާރާތުގެ ސަބަބުން ފަތުރުވެރިކަމުގެ ސިނާއަތުގެ އެކި ފަރާތްތަކާއި ގުޅިގެން މިކުރެވޭ މަސައްކަތުގެ ސަބަބުން ދިވެހިރާއްޖޭގައި ހުރި ސްޕޯޓްސް ފިޝިންފަދަ އެކިއެކި ސްޕޯޓްސް ޓޫރިޒަމްގެ ފުރުސަތުތައް ދުނިޔެއަށް އިޝްތިހާރުކުރެވިގެންދާނެ. މި މުބާރާތުގެ އިންތިޒާމުތަކަށް ސިނާއަތުގެ އެކި ފަރާތްތަކާއި އެހެނިހެން މުވައްސަސާތަކުން ލިބެމުން އަންނަ ތަރުހީބާއި އެހީތެރިކަން ޝުކުރުވެރިކަމާއެކު ފާހަގަކުރަން. އަދި ވަކިން ހާއްސަކޮށް ކްލަބުގެ މެމްބަރުންނާއި އެމްއެމްޕީއާރުސީގެ މެނޭޖްމަންޓުން ލިބެމުންދާ އެހީތެރިކަން ފާހަގަކުރަން." ސާއިފް ވިދާޅުވިއެވެ.

ބުރުނު ބޮމަ މުބާރާތަކީ ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި ބައިނަލްއަގްވާމީ ސްޕޯޓްސް ފިޝިންއަށް ޝައުގުވެރިވާ ފަރާތްތަކަށް ހާއްސަ މުބާރާތެކެވެ. މި ސްޕޯޓްސް ފިޝިން މުބާރާތުގައި މަސް ބޭނުމަށް ހަމަޖެހިފަވަނީ ބައިނަލްއަގުވާމީ މިންގަނޑުތަކަށް ފެތޭގޮތަށެވެ. އަދި މިމުބާރާތުގައި "ކެޗް އެންޑް ރިލީޒް" ފަދަ ދެމެހެއްޓެނިވި މަސްވެރިކަމަށް ބާރު އެޅުމުގެ އުކުޅުތަށް ހިމެނުމަށް ވަނީ ހަމަޖެހިފައެވެ.

މިމުބާރާތާއި ބެހޭ ގޮތުން އެމްއެމްޕީއާރުސީގެ ސީއީއޯ އަދި އެމްޑީ ޝިއުރީ ވިދާޅުވީ ކުޅިވަރު މަސްވެރިކަމުގެ ދުނިޔޭގައި ރާއްޖެ ކުރިއަރަމުން ދާނެ ދުވަސް ފެންނާނެ ކަމަށް އުއްމީދު ކުރައްވާކަމަށެވެ.

"މި މުބާރާތަކީ ދެމެހެއްޓެނިވި ގޮތެއްގައި މަސްވެރިކަމާއި ފަތުރުވެރިކަމަށް ކުރާ މަސައްކަތްތައް ކުރިއެރުވުމަށް އެޅިގެންދާ އިތުރު ފިޔަވަޅެއް. ދިވެހިރާއްޖެ ފުރަތަމަ ފަހަރަށް ދުނިޔޭގެ "ލީޑިން ގްރީން ޑެސްޓިނޭޝަން" އެވޯޑު ހާސިލުކޮށްފައި ވާއިރު ރާއްޖޭގައި ޒަމާނުއްސުރެ ކުރެވެމުން އަންނަ ދެމެހެއްޓެނިވި މަސްވެރިކަމުގެ އާދަކާދަތައް ދުނިޔެއަށް އިޝްތިހާރުކުރުމަކީ އަޅުގަނޑުމެންގެ ވަރަށް ބޮޑު މަގުސަދެއް. އުއްމީދަކީ މި ހަރަކާތުގެ ސަބަބުން ބައިނަލްއަގްވާމީ މަސްވެރިން ރާއްޖެ ގެނައުމާއި ސްޕޯޓްސް ޓޫރިޒަމްގެ އެކި ދާއިރާތަކުގައި ފާހަގަކޮށްލެވޭ ގައުމަކަށް ރާއްޖެ ހެދުން."

"ބުރުނު ބޮމަ" މަސްވެރިކަމުގެ މުބާރާތަކީ ރާއްޖެ އިޝްތިހާރު ކުރުމަށް އެމްއެމްޕީއާރުސީން އަންނަ އަހަރު ކުރިއަށް ގެންދިއުމަށް ނިންމާފައިވާ ގިނަ ހަރަކާތްތަކުގެ ތެރޭގައި ހިމެނޭ ކަމެކެވެ.