އިކޮނޮމިކް ކްރައިމް ޑިޕާޓްމަންޓްގެ ހެޑް ސުޕްރިޓެންޑެންޓް އޮފް ޕޮލިސް ރަޖުނީ ޝުއައިބުއާއި އިތުރު ފުލުހުން ފްލެޓް ގަތުމުގައި އުސޫލާ ހިލާފުން ކަމެއް ކޮށްފައިވޭ ތޯ ފުލުހުން ބަލަން ފަށައިފިއެވެ.

ރަޖުނީއަކީ އެޗްޑީސީގެ ވެރިން ނަހަމަގޮތުގައި ބިންދިންކަމަށް ތުހުމަތުކޮށް ފުލުހުން ކުރިއަށް ގެންދާ ތަހުގީގު ލީޑުކުރައްވާ އެއްފަރާތެވެ. އެޗްޑީސީގެ މައްސަލާގައި މައުލޫމާތު ދިނުމަށް މިދިޔަ ބުރާސްފަތި ދުވަހުގެ ރޭ ފުލުހުން ބޭއްވި ނޫސްވެރިންގެ ބައްދަލުވުމުގައި ރަޖުނީ ބައިވެރިވެ، ތަހުގީގުގެ މައުލޫމާތު ހިއްސާކޮށްފައިވެއެވެ.

އެ ނޫސްވެރިންގެ ބައްދަލުވުމަށްފަހު، ރަޖުނީ އާއި އޭނާގެ އަންހެނުން ވިނަރެސް ފްލެޓްތައް ގަވާއިދާ ހިލާފަށް ގަތް ކަމުގެ ތުހުމަތު ސޯޝަލް މީޑިއާގައި ކުރަންފެށިއެވެ. އަދި ވިނަރެސް ފްލެޓް ވިއްކިކަމަށް އެޗްޑީސީން މީގެ ކުރިން އާންމުކޮށްފައިވާ ލިސްޓުގައި ރަޖުނީއާއި އޭނާގެ އަންހެނުންގެ ނަން ނެތްކަމަށް ބުނެ ވާހަކަ ދައްކަމުން ދިޔައެވެ.

ނަމަވެސް ބައެއް ފަރާތްތަކުން ސޯޝަލް މީޑިއާގައި ބުނެފައިވަނީ ރަޖުނީއަށް ފްލެޓް ލިބުނީ މިދިޔަ ސަރުކާރުން ހިޔާ ފްލެޓާއި ވިނަރެސް ފްލެޓް ބަދަލުކުރުމަށް ދިން ފުރުސަތުގެ ތެރެއިން ގަވާއިދާ އެއްގޮތަށްކަމަށެވެ. އަދި ފްލެޓްގެ ވެރިފަރާތަކީ ރަޖުނީ ކަމަށާއި އޭނާގެ އަންހުނުންނަކީ ފްލެޓްގެ ކޯއެޕްލިކެންޓްކަމަށްވެސް ބުނެފައިވެއެވެ.

މިކަމާ ގުޅިގެން އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން ވިދާޅުވީ ރަޖުނީއާ ގުޅޭ ގޮތުން ސޯޝަލް މީޑިއާގައި ދައުރުވަމުންދާ ވާހަކަތަކާ ގުޅިގެން ފުލުހުން އެކަން ބަލަމުންދާ ކަމަށެވެ.