މިދިޔަ ސަރުކާރުގައި ރޯޑް ޑިވެލޮޕްމަންޓް ކޯޕަރޭޝަން، އާރުޑީސީން ހިންގާފައިވާ ވައްކަމާއި ޚިޔާނާތާއި ކޮރަޕްޝަން އަދި މަނީލޯންޑަރިންގެ މައްސަލައާ ގުޅިގެން އެ ކުންފުނީގެ ކުރީގެ މެނޭޖިންގ ޑިރެކްޓަރ މޫސާ އަލިމަނިކު އާއި ކުރީގެ ޗީފް ފައިނޭންޝަލް އޮފިސަރ ޔާސިރު ހަސަން ދިރިއުޅޭ އެޕާޓްމަންޓަށް ފުލުހުން ވަދެ ބަލާ ފާސްކޮށްފިއެވެ.

ފުލުހުން ބުނީ އާރުޑީސީއާ ގުޅޭ ގޮތުން ފުލުހުން ތަހުގީގު ކުރަމުންގެންދާ މައްސަލައިގެ ތަހުގީގުގެ ބޭނުމަށް، އާރުޑީސީގެ ކުރީގެ އެމްޑީ މޫސާ އަލި މަނިކު ދިރިއުޅޭތަން އަދި ސީއެފްއޯ ޔާސިރު އަށް ނިސްބަތްވާ 2 ތަނެއް، ބަލާފާސްކޮށް އިލެކްޓްރޯނިކް އައިޓަމްސް ގެންދިޔަކަމަށެވެ.

އާރުޑީސީގެ ކުރީގެ ޗީފް ފައިނޭންޝަލް އޮފިސަރު ޔާސިރު ހަސަން އަކީ މޫސާ އަލިމަނިކުގެ ޅިޔަނެވެ.

އާރުޑީސީން ހިންގާފައިވާ ވައްކަމާއި ޚިޔާނާތާއި ކޮރަޕްޝަން އަދި މަނީލޯންޑަރިންގެ މައްސަލަ ފުލުހަށާއި އޭސީސީއަށް ފުރަތަމަ ހުށަހެޅީ 2022 ގައި އެމްއެމްއޭގެ ފައިނޭންޝަލް އިންޓެލިޖެންސް ޔުނިޓުންނެވެ. ނަމަވެސް އޭރުގެ ސަރުކާރުން އާރުޑީސީގެ ވެރިންނާ މެދު އޭރު ފިޔަވަޅެއް އަޅާފައެއް ނުވެއެވެ.