ދަ ޑިމޮކްރޭޓްސްގެ ރައީސް ކަމުގެ މަގާމަށް ރައްޔިތުންގެ މަޖިލީހުގެ ކުރީގެ މެންބަރު އިމްތިޔާޒު ފަހުމީ އަދި ނައިބު ރައީސްގެ މަގާމަށް ކުރީގެ މެންބަރު އިބްރާހީމް ވަހީދު (ވައްޑޭ) މިރޭ އިންތިހާބުކޮށްފިއެވެ.

އިންތި އާއި ވައްޑޭ ދަ ޑިމޮކްރޭޓްސްގެ އެންމެ އިސް ދެ މަގާމަށް އިންތިޚާބުކުރީ މިރޭ ބޭއްވި އެ ޕާޓީގެ ގައުމީ މަޖިލީހުގައި ނެގި ވޯޓަކުންނެވެ. ރައީސްގެ މަގާމަށާއި ނައިބު ރައީސްގެ މަގާމަށް ކުރިމަތިލެއްވީވެސް މި ދެބޭފުޅުން އެކަންޏެވެ.

ދަ ޑިމޮކްރޭޓްސްގެ ރައީސް ކަމާއި ނައިބު ރައީސްގެ މަގާމު ހުސްވީ ކުރިން އެމަގާމްތަކުގައި ތިއްބެވި ބޭފުޅުން އަލުން އެމްޑީޕީއާ ގުޅުމުންނެވެ. އަދި މަގާމްތަކަށް މީހުން އައްޔަނުކުރެވެންދެން ވަގުތީ ރައީސްގެ ގޮތުގައި މަސައްކަތް ކުރެއްވީ މިހާރުގެ ނައިބު ރައީސް މުހައްމަދު ފިރުޝާންއެވެ. އޭނާ ވަނީ ރައީސްގެ މަގާމަށް އިންތި ހޮވުމާ ގުޅިގެން އިންތިއާ ރިޔާސަތު ހަވާލުކުރައްވާފައެވެ.

ދަ ޑިމޮކްރޭޓްސް ޕާޓީއަކީ 2023 ވަނަ އަހަރުގެ ރިޔާސީ އިންތިޚާބާ ދިމާކޮށް، އޭރުގެ އެމްޑީޕީގެ ބައެއް މެންބަރުން އެޕާޓީން ވަކިވެ އުފެއްދި ޕާޓީއެކެެވެ. ޕާޓީ އުފެއްދުމުގައި އިސްކޮށް ހަރަކާތްތެރިވެވަޑައިގެންނެވީ ކުރީގެ ރައީސް އަދި އޭރުގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދުއެވެ.