ރޯދަ މަހު ގޭބިސީތަކުގެ ފެން ބިލުތަކަށް ޑިސްކައުންޓް ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާތީ، އެމްޑަބްލިއުއެސްސީން ޑިސްކައުންޓް ދިނުމުގެ އުސޫލު އާއްމުކޮށްފި އެވެ.

އެ ކުންފުނިން ބުނީ، އަންނަ އޭޕްރީލް މަހު ގޭބިސީތަކަށް ފޮނުވާ ބިލުތައް އާއްމު މަހަކާ އަޅާބަލާއިރު ބޮޑު ނުވާނެ ގޮތަށް ޑިސްކައުންޓް ދިނުމަށް ނިންމާފައިވާ ކަމަށެވެ. މި ގޮތުން އާއްމު މަހެއްގެ ފެނުގެ މިންވަރު ކަނޑައަޅާނީ 2024 ވަނަ އަހަރުގެ ފެބްރުއަރީ، މާޗު އަދި އޭޕްރީލް މަސް ނުހިމަނައި، އެ އަހަރުގެ ބާކީ އޮންނަ 9 މަހުގެ އެވްރެޖަށް ބަލައިގެންނެވެ.

އޭޕްރީލް މަހަށް ތައްޔާރުކުރާ ބިލު، އާއްމު މަހުގެ ބިލަށް ވުރެ ބޮޑުވާ ނަމަ، އެ ބޮޑުވާ މިންވަރު ޑިސްކައުންޓުގެ ގޮތުގައި އެއްކޮށް އުނިކޮށްދޭނެ ކަމަށް އެމްޑަބްލިއުއެސްސީން ބުންޏެވެ. އަދި އުނިކޮށްދެވޭ މިންވަރަކީ އޭޕްރީލް މަހު ފޮނުވާ ބިލުގެ 10 ޕަސެންޓަށް ވުރެ ކުޑަ މިންވަރެއް ނަމަ ޑިސްކައުންޓުގެ މިންވަރު 10 ޕަސެންޓާ އެއްވަރަށް މަތިކޮށްދޭން އެމްޑަބްލިއުއެސްސީން ވަނީ ނިންމައިފަ އެވެ.

އާއްމު މަހުގެ ބިލަށް ވުރެ އޭޕްރީލް މަހު ފޮނުވާ ބިލުގެ އަދަދު ކުޑަ ނަމަ ޑިސްކައުންޓުގެ ގޮތުގައި އޭޕްރީލް މަހު ފޮނުވާ ބިލުން 10 ޕަސެންޓު އުނިކޮށްދޭނެ ކަމަށް ވެސް ފެން ކުންފުނިން ބުންޏެވެ. އެމްޑަބްލިއުއެސްސީން ބުނީ އޭޕްރީލް މަހު އަލަށް ބިލް ކުރާ މީޓަރުތަކަށާއި ކުރިން ރަޖިސްޓަރީ ކޮށްފައިވީ ނަމަވެސް މިހާތަނަށް ބިލް ނުކުރާ ކަސްޓަމަރުންނަށް ފޮނުވާ ފުރަތަމަ ބިލަކީ އޭޕްރީލް މަހުގެ ބިލުް ނަމަ އެ ކަސްޓަމަރުންގެ ބިލުން ވެސް 10 ޕަސެންޓު އުނިކޮށްދޭނެ ކަމަށެވެ.

މިކަމުގައި ސުވާލެއް އޮތް ނަމަ އެ ކުންފުނީގެ ހޮޓްލައިން 105 އަށް ނުވަތަ 1050 އަށް އެސްއެމްއެސް ކޮށްގެން ނުވަތަ mail@mwsc.co.mv އަށް މެއިލް ކޮށްގެން މައުލޫމާތު ލިބޭނެ ކަމަށް އެމްޑަބްލިއުއެސްސީން ބުންޏެވެ.