ސައިންސް އެންޑް ޓެކްނޮލޮޖީ މިނިސްޓްރީ އުވާލާ, އެ މިނިސްޓްރީގެ މަސައްކަތްތައް އެންވައިރޮންމަންޓް މިނިސްޓްރީގެ ދަށަށް ބަދަލުކުރުމުން, ކުރީގެ ސައިންސް އެންޑް ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް ސަރުކާރަށް ފާޑު ވިދާޅުވެއްޖެއެވެ.

ރައީސުލްޖުމްހޫރިއްޔާ ވަނީ ސައިންސް އެންޑް ޓެކްނޮލޮޖީ މިނިސްޓްރީ އުވާލާ, އެންވަޔަރަންމަންޓް މިނިސްޓްރީގެ ނަން އެންވަޔަރަންމަންޓް, ކްލައިމެޓް ޗޭންޖް އެންޑް ޓެކްނޯލޮޖީގެ ނަމަށް ބަދަލުކޮށްފައެވެ. އަދި އެ މިނިސްޓްރީގެ ވަޒީރަކަށް ރައީސް އޮފީހުގެ ޕޮލިސީ ސެކްރެޓަރީ އާމިނަތު ޝައުނާ އައްޔަނު ކުރައްވާފައެވެ.

މިކަމަށް ފާޑު ވިދާޅުވެ މަލީހުގެ ކުރެއްވި ޓުވީޓެއްގައި ވިދާޅުވީ ޓެކް މިނިސްޓްރީ އުވާލުމަކީ 'ދުނިޔެ ހިނގާ ގޮތާ އިދިކީލިކޮށް މިސަރުކާރު ދާން ބޭނުންވާ ކަމުގެ ހެއްކެއް' ކަމަށެވެ. އަދި އެމްޑީޕީ އަކީ ވަކަލާތު ކުރާ ގޮތާ ޚިލާފަށް މުސްކުޅި ބޯދާ ވިސްނުމުގެ ޕާޓީއެއްކަން ދަލީލުކޮށްދޭ ކަމެއް ކަމަށް އޭނާ ވިދާޅުވިއެވެ. މީގެ އިތުރުން އެއީ ޓެކް ކޮމިއުނިޓީ ބޮލުގަ އެޅުވި ތަފާލެއް ކަމަށް މަލީހު ވިދާޅުވިއެެވެ.

މަލީހު ސަރުކާރަށް ފާޑުކިޔަން ފެށީ, އޭނާގެ އިތުބާރު ނެތް ކަމަށް މަޖިލީހުން ވޯޓުނަގާ މަޤާމުން ވަކިކުރުމުންނެވެ. މަލީހު މަޤާމުން ވަކިކުރީ ސައިންސް މިނިސްޓްރީގެ މަސައްކަތްތައް އެދެވޭ ގޮތަށް ކުރިއަށް ނުދާކަމަށް ބުނެއެވެ. އަދި ޚާއްސަކޮށް އިންޓަނެޓުގެ އަގު ހެޔޮކުރުމާއި މިނިސްޓްރީގެ ސިޔާސަތު ތަންފީޒު ނުކުރެވޭ ކަމުގެ ތުހުމަތުގައެވެ.

މަލީހު ވަކިކުރުމަށްފަހުވެސް އަދިވެސް އިންޓަނެޓުގެ އަގަކަށް ބަދަލެއް ނާދެއެވެ. އަދި އެކަމުގައި ސަރުކާރުގެ ސިޔާސަތު ތަންފީޒެއްވެސް ނުކުރެއެވެ.