ޕަބްލިކް ސަރވިސް މީޑިއާ (ޕީއެސްއެމް) ބޯޑު ޑިރެކްޓަރުގެ މަގާމުން މުހައްމަދު އާސިފް(މޮންދު) އިސްތިއުފާ ދެއްވައިފިއެވެ.

މޮންދު އިސްތިއުފާ ދެއްވީ އަމިއްލަ މީޑިއާއަކުން މާ ރަނގަޅު އޮފާއެއް ލިބިގެން ކަމަށް އޭނާ މީޑިއާގައި ވަނީ ވިދާޅުވެއެވެ. އަދި ވާދަ ވެރި މީޑިއާއެއްގައި މަސައްކަތް ކުރަމުން ޕީއެސްއެމް ބޯޑުގައި މަސައްކަތް ކުރުން ރަނގަޅު ނޫން ކަމަށް ދެކެވަޑައިގަންނަވާތީއެވެ.

މުހައްމަދު އާސިފް ވަނީ ޓީވީއެމްގައި 23 އަަހަރަށްވުރެ ގިނަ ދުވަހު މަސައްކަތް ކުރައްވާފައެވެ. އެތަނުގެ ސީސީއޯގެ މަގާމު އަދާކުރެއްވުމަށްފަހު އިސްތިއުފާ ދެއްވާ ވީޓީވީއާ ގުޅިވަޑައިގަތެވެ. ވީޓީވީގައި 5 އަހަރު މަސައްކަތް ކުރެއްވުމަށްފަހު ވީޓީވީން އިސްތިއުފާ ދެއްވީ 2019 ވަނަ އަހަރުގައެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް, ޕީއެސްއެމްގެ ބޯޑަށް އާސިފް އައްޔަނުކުރެއްވީ 2021 ވަނަ އަހަރުގެ ނޮވެމްބަރުގައެވެ.

ޕީއެސްއެމް ބޯޑުގައި މަސައްކަތް ކުރެއްވިއިރުވެސް މޮންދު ދިޔައީ އަމިއްލަ ގޮތުން މީޑިއާގެ މަސައްކަތް ކުރައްވަމުންނެވެ.