ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީގެ ޑިރެކްޓަރުންގެ ބޯޑުގައި ހިމެނޭ ޗެއަރމަން ފިޔަވާ ހުރިހާ ޑިރެކްޓަރުން މިއަދު ސަސްޕެންޑުކޮށްފިއެވެ.

ޕީސީބީން އެޗްޑީސީގެ ޑިރެކްޓަރުން ސަސްޕެންޑުކޮށްފައި މި ވަނީ ބިންވެރިޔާ ސްކީމްގެ ދަށުން ގޯތި ނުލިިބޭ ބަޔަކަށް ގޯތި ދިންކަމަށް ބުނެ، މައްސަލަތަކެއް ފެންމަތިވެ އެ މައްސަލަ ފުލުހުން ތަހުގީގުކުރަމުން ދިއުމާ ގުޅިގެންނެވެ. ބިން ލިބުނުކަމަށް ބުނާ މީހުންގެ ތެރޭގައި އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދުގެ ބޭބެ މުޙައްމަދު ފަޒީލް ރަޝީދުވެސް ހިމެނެއެވެ.

ޕީސީބީން ނެރުނު ބަޔާނެއްގައި ވިދާޅުވީ އެޗްޑީސީގެ ޗެއަރޕާސަން ފިޔަވައި ހުރިހާ ބޯޑު މެންބަރުން ސަސްޕެންޑުކޮށްފައިވަނީ އެ ކުންފުންޏާ ގުޅޭގޮތުން ދިވެހި ފުލުހުންގެ ޚިދުމަތުން ހިންގާ ތަހުގީގަށް ޖާގަދީ، ފުރިހަމަ އެހީތެރިކަން ދިނުމުގެ ގޮތުން ކަމަށެވެ. އަދި ޑިރެކްޓަރުން ސަސްޕެންޑްކޮށްފައިވަނީ ފުލުހުންގެ ތަހުގީގު ނިމި ޕީސީބީން ވަކިގޮތެއް އަންގަންދެންނެވެ.

ސަސްޕެންޑް ކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުވެސް ހިމެނެއެވެ.

ފަޒުލްގެ އިތުރުން ދެން ބޯޑުގައި ހިމެނެނީ ޑިރެކްޓަރ، އަޒްހާރު އަބްދުﷲ ސަޢީދުއާއި ޑިރެކްޓަރ، އިބްރާހިމް ޔޫސުފް ފުޅާއި ޑިރެކްޓަރ، މުޙައްމަދު ވިޝާމްއާއި ޑިރެކްޓަރ، އުލާ މުޙައްމަދު ރަޝީދުއާއި ޑިރެކްޓަރ، އާރިފް އަބްދުއްސަމަދުއާއި ޑިރެކްޓަރ، މުޙައްމަދު ނާޖިލްއާއި ޑިރެކްޓަރ، މުޙައްމަދު ވަހީދުއާއި ޑިރެކްޓަރ، ފާތިމަތު މިޒްނާ އަލީގެ އިތުރުން ޑިރެކްޓަރ، ޔޫސުފް ވަހީދު އެވެ.