ކޮރަޕްޝަންގެ ގިނަ ތުހުމަތުތަކެއްކޮށް، ފުލުހުން މައްސަލަ ބަލަމުންދަނިކޮށް ހައުސިންގ ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު މިރޭ މަގާމުން އިސްތިއުފާ ދީފިއެވެ.

އޭނާ ރައީސުލްޖުމްހޫރިއްޔާއަށް ފޮނުއްވި އިސްތިއުފާގެ ސިޓީގައި ބުނެފައިވަނީ ސޯޝަލް މީޑިއާއާއި އެހެނިހެން ގޮތްގޮތުން އޭނާގެ މައްޗަށް ކުރާ ތުހުމަތުތަކީ ދޮގެއްކަމަށާއި އޭނާ މަސައްކަތް ކޮށްފައިވަނީ ކުންފުނީގެ ބޯޑުގެ ނިންމުންތަކާއި އުސޫލުތަކާ އެއްގޮތްވާ ގޮތުގެމަތިން ކުންފުނީގެ މަސްލަހަތު އިސްކޮށްގެން ކަމަށެވެ.

އަދި ބިންވެރިޔާ ސްކީމްގެ ބިންތަކާ ގުޅޭ ގޮތުން ކުރާ ތުހުމަތުތަކަކީ އެޗްޑީސީއާ ގުޅުމެއް ނެތް ކަމެއްކަމަށާއި އެ މައްސަލަ ވީހާވެސް އަވަހަކަށް ތަހުގީގުކޮށް ކަމުގެ ހަގީގަތް ހާމަކުރެއްވުމަށް އެދިފައިވެއެވެ.

ނަމަވެސް ކުރެވޭ ތުހުމަތުތަކާ ގުޅިގެން ސަރުކާރުގެ ސިޔާސަތުތަކާއި ކުންފުނި ހުއްޓިފައި އޮންނަން ބޭނުންނުވާ ކަމަށާއި އެހެންވެ މަގާމުން އިސްތިއުފާ ދިނީކަމަށް ބުނެފައިވެއެވެ.

ފަޒުލް މަގާމުން އިސްތިއުފާ ދިންއިރު، އުސޫލާ ޚިލާފަށް ބިންތައް ދޫކޮށްފައިވާ ކަމަށް ތުހުމަތު ކޮށްފައިވެއެވެ. އެގޮތުން އުސޫލާ ހިލާފަށް ބިން ދީފައިވާ މީހުންގެ ތެރޭގައި ފަޒުލްގެ ބޭބެ މުޙައްމަދު ފަޒީލް ރަޝީދުވެސް ހިމެނެއެވެ.

ބިންވެރިޔާ ސްކީމާއި ގެދޮރުވެރިޔާ ސްކީމް އަދި ފެލެޓްތައް އުސޫލާ ޚިލާފަށް ވިއްކާފައިވާ ކަމުގެ ތުހުމަތުވެސް ފަޒުލްއާއި އެޗްޑީސީގެ ވެރިންގެ މައްޗަށް ކުރެއެވެ. ހުރިހާ މައްސަލަތައް ފުލުހުންދަނީ ތަހުގީގުކުރަމުންނެވެ.