ފާއިތުވި 24 ގަޑިއިރު މާލެއަށް ކުރި ވިއްސާރާގައި މާލޭގެ ބޮޑެތި މަގުތަކުގައި ފެން ބޮޑުވެ ގެތަކަށް ގެއްލުންވެއްޖެެއެވެ.

މާލޭގެ ގިނަ މަގުތަކުގައި ފެން ބޮޑުވެފައިވާއިރު، ފެން ހިންދުމުގެ މަސައްކަތް ސިފައިންނާއި ފުލުހުން ދަނީ ކުރަމުންނެވެ. އަދި ފެން ވަދެފައިވާ ގެތަކާއި ވިޔަފާރިތަކަށް އެހީތެރިކަން ފޯރުކޮށް ދިނުމުގެ މަސައްކަތްވެސް ދަނީ ކުރަމުންނެވެ.

މެޓް އޮފީހުން މައުލޫމާތު ދޭ ގޮތުގައި އެއްގަޑިއިރު ތެރޭގައި 60 މިލިމީޓަރުގެ ވާރޭ މާލޭ ސަރަހައްދަށް ވެހިފައިވެއެވެ. އަދި ފާއިތުވި 24 ގަޑިއިރު ތެރޭގައި 140 މިލިމީޓަރުގެ ވާރޭ ވެހިފައިވާކަމަށް މެޓް އޮފީހުން ބުނެއެވެ.

ކުރިއަށް އޮތް 5 ގަޑިއިރުވެސް ވާރޭވެހޭނެކަމަށް މެޓް އޮފީހުން ލަފާކުރާއިރު، މޫސުން ރަނގަޅު ވާނެކަމަށް ބެލެވެނީ ހޮނިހިރު ދުވަހުގައެވެ.