ޓްރާންފޯމަރުން ވައްކަންކުރަން އުޅުނު މީހާއާއި ކުރިމަތިލި މުވައްޒަފަށް ސްޓެލްކޯގެ މެޑަލް އޮފް ބްރޭވަރީ ދީފިއެވެ.

މިއަދު ބޭއްވި ރަސްމިއްޔާތެއްގައި ސްޓެލްކޯގެ މެޑަލް އޮފް ބްރޭވަރީ އާއި އަގުވަޒަންކުރުމުގެ ހަނދާނީ ލިޔުން، އެ ހާދިސާގައި އަނިޔާވި އަހުމަދު ވިޝާންއަށް އެރުވީ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީއެވެ.

ހުޅުމާލޭ ދެވަނަ ފިޔަވަހީގައި ހުރި ޓްރާންފޯމަރަކުން ވައްކަންކުރަން އުޅުނީ ރޭގެ ވަގުތެއްގައެވެ. އަދި ސްޓެލްކޯގެ ދެ މުވައްޒަފުން ވަނީ ވަގުންނާ ކުރިމަތިލާ އެމީހުންގެ ތެރެއިން އެކަކު ހިފަހައްޓާ ފުލުހުންނާ ހަވާލުކޮށްފައެވެ. ވިޝާން އާއިއެކު ޙާދިސާ ހިނގި ސަރަޙައްދުގައި ޙަރަކާތްތެރިވި ސްޓެލްކޯގެ އިތުރު މުވައްޒަފެއް ކަމަށްވާ ސަރުވާން މުޙައްމަދަށްވެސް ކުންފުނީގެ ފަރާތުން ވަނީ އަގުވަޒަންކުރުމުގެ ހަނދާނީ ލިޔުން ދީފައެވެ.

މި ދެ މުވައްޒަފުންގެ އަގުވަޒަންކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯގެ މެނޭޖިންގ ޑިރެކްޓަރ ޙުސައިން ފަޙުމީ ވިދާލުވީ ސްޓެލްކޯއަކީ މުވައްޒަފުން ކުރާ މަސައްކަތުގެ އަގު އަބަދުވެސް އަދާކުރާ ކުންފުންޏެއް ކަމަށެވެ.

"މި ކުންފުންޏަކީ މުވައްޒަފުންގެ އަގުވަޒަންކޮށް، މުވައްޒަފުންނަށް ދިމާވާ ކަންކަމުގައި އަޅާލާ، އޯގާތެރި މެނޭޖްމަންޓެއް އޮންނަ ކުންފުންޏެއް އަބަދުވެސް. އަޅުގަނޑު ތިބޭފުޅުންނަށް ޔަޤީންކަން މި އަރުވަނީ މިއަދުވެސް ކުންފުނީގެ މެނޭޖްމަންޓް އޮތީ ހަމަ އެގޮތަށޭ. ތިބޭފުޅުންނަށް ދިމާވާ ކޮންމެ ކަމެއްގަ އަޅުގަނޑުމެން ފަހަތުގަ ތިބޭނަން. އެކަމަކީ އަނިޔާއެއް ލިބުންކަމުގައިވިޔަސް، އުފަލެއް ލިބުންކަމުގައިވިޔަސް އަދި ހިތާމައެއް ލިބުންކަމުގައިވިޔަސް ކުންފުނީގެ މެނޭޖްމަންޓް އެކަމުގަ (މުވައްޒަފުންގެ) ފަހަތުގަ ތިބޭނެ. އެކަމުގަ (މުވައްޒަފުން ބޭނުންވާ) އެއްބާރުލުން އަޅުގަނޑުމެން ތިބޭފުޅުންނަށް ދޭނަން." ފަހުމީ ވިދާޅުވިއެވެ.

މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ނާޡިރު ވިދާޅުވީ، ކުންފުންނަށް މިހާތަނަށް ލިބިފައިވާ ކޮންމެ ކާމިޔާބެއްގެ ފަހަތުގައިވަނީ މުވައްޒަފުންނަށް ވަޒީފާގެ މާހައުލުގަ ލިބެންޖެހޭ ސަލާމަތާއި ރައްކާތެރިކަމާއި އިތުބާރާއި ހިތްހަމަޖެހުން ހޯދައިދެވިފައި އޮތުން ކަމަށެވެ.

"އަޅުގަނޑުމެން ކުންފުނީގެ އެންމެ ބޮޑު ރައުސުލްމާލަކީ މުވައްޒަފުން. މިއާމެދު ސުވާލެއް ނެތް. ޝައްކެއް ނެތް. ހަމައެގޮތަށް މަސައްކަތުގެ މާހައުލަކީ، ވަޒީފާގެ މާހައުލަކީ، މުވައްޒަފުންނަށް ސަލާމަތާ ރައްކަތެރިކަމާ ހިތްހަމަޖެހުން ލިބިފަ އޮންނާނެ ތަނަކަށް ވާނެޖެހޭނެކަމީ އެއީ އަޅުގަނޑުމެން އެންމެން ޤަބޫލުކުރާ ކަމެއް. އަދި އަޅުގަނޑުމެންނަށް މިއަދާހަމައަށް ލިބިފަ އޮތް ކާމިޔާބެގެ ފަހަތުގަވެސް އޮތީ، ކޮންމެ ކުރިއެރުމެއްގެ ފަހަތުގަވެސް އޮތީ، އަޅުގަނޑުމެންގެ މުވައްޒަފުންނަށް ވަޒީފާގެ މާހައުލުގަ ލިބެންޖެހޭ ސަލާމަތާ ރައްކާތެރިކަމާ، އިތުބާރާ ހިތްހަމަޖެހުން ހޯދައިދެވިފަ އޮތީމަ. އެއީ އަޅުގަނޑުމެންގެ މާޒީގަ އަޅުގަނޑުމެންގެ ވެރިންނާ އަޅުގަނޑުމެންގެ މުވައްޒަފުން ކުރި ބުރަ މަސައްކަތްތަކުގެ ނަތީޖާ" ނާޡިރު ވިދާޅުވިއެވެ.

ޓްރާންސްފޯމަރުން ވައްކަން ކުރަން އުޅުނު މީހުން އަތުލައިގަނެވިފައިވަނީ ރޭ ހުޅުމާލޭގެ ދެވަނަ ފިޔަވަހީގެ ބައެއް ހިސާބުތަކުން ކަރަންޓުގެ ޚިދުމަތް ކެނޑުމާއި ގުޅިގެން، ޓްރާންސްފޯމަރުތައް ޗެކުކުރުމުގެ މަސައްކަތް ކުރަމުންދަނިކޮށެވެ. މި ހާދިސާގައި ވަގުން މަސައްކަތްކޮށްފައިވަނީ ޓްރާންސްފޯމަރުތަކުގެ އެތެރޭގައި ލޮއިން ހަދާފައިވާ ބައިތައް ވަގަށްނެގުމަށެވެ.

ވަގުން ސްޓެލްކޯގެ މުވައްޒަފު އަޙުމަދު ވިޝާންއަށް ޙަމަލާދީފައި ވަނީ އެމީހުން ބޭނުންކުރަމުންދިޔަ ރެންޗަކުންނެވެ. މި ހަމަލާގައި ވިޝާންގެ މޫނުމަތިން ދެތަނެއް ފަޅައިގެންގޮސް އަނިޔާވެފައިވެއެވެ.

މި ޙާދިސާއާއި ގުޅިގެން ސްޓެލްކޯގެ މެނޭޖްމަންޓުން ވަނީ ސްޓެލްކޯގެ ލާޒިމް ވަސީލަތްތައް (ކްރިޓިކަލް ފެސިލިޓީސް) ރައްކާތެރިކޮށް ބެލެހެއްޓުމަށް މިހާރު ކުރަމުންދާ މަސައްކަތްތައް އިތުރަށް ފުޅާކޮށް، އަދި ކަމާއިބެހޭ ފަރާތްތަކާއި ގުޅިގެން މިކަމަށް އިތުރު މަސައްކަތް ކުރުމަށް ނިންމާފައެވެ.