ކޮރަޕްޝަންގެ ވަބާ ނައްތާލެވޭނީ ތުހުމަތުކުރެވޭ ފަރާތަކާމެދު ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު ޢަމަލުކުރެވިގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އެމްއެމްޕީއާރުސީގެ ޚިޔާނާތުގައި ބައިވެރިވި ބައެއް މީހުންނާއެކު ކުރީ ސަރުކާރުން ހަދާފައިވާ އިއުތިރާފުގެ އެއްބަސްވުންތައް އުވާލުމަށް ޕްރޮސެކިއުޓަރ ޖެނެރަލް އައްބާސް ޝަރީފް ނިންމެވުމާ ގުޅިގެން އެކަމަށް މަރުހަބާ ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އެކްސްގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ އެމްއެމްޕީއާރްސީގެ ޚިޔާނާތުގެ ބޮޑު މައްސަލައިގައި ބައެއް ފަރާތްތަކަށް ތަފާތު އިމްތިއާޒްތަކެއް ލިބިދީ އެމީހުންގެ މައްޗަށް އިތުރު ދަޢުވާ ނުކުރުމަށް އެއެްބަސްވެ ކުރީގެ ޕްރޮސިކިއުޓަރ ޖެނެރެލް ހައްދަވާފައިވާ އެއްބަސްވުންތައް ބާޠިލް ކުރައްވައި އެމީހުންގެ މައްޗަށް ތުޙުމަތުކުރެވޭ މައްސަލަތައް ތަޙްޤީޤު ކުރައްވަވައި އެއޮފީހަށް ފޮނުވުމަށް ކަމާބެހޭ އިދާރާތަކަށް ޕްރޮސިކިއުޓަރ ޖެނެރަލް އެންގެވުމާގުޅިގެން އެކަަމަށް މަރުޚަބާ ދަންނަވާކަމަށެވެ.

އަދި ޒަމާނުއްސުރެން ރާއްޖެއަށް ކުރިމަތިވެފައިވާ ކޮރަޕްޝަންގެ ވަބާ ނައްތާލެވޭނީ އެފަދަ މައްސަލަތަކުގައި ހިމެނޭކަމަށް ތުހުމަތުކުރެވޭ ހުރިހާ ފަރާތަކާމެދުވެސް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު ޢަމަލުކުރެވިގެންކަމަށް ރައީސް ވިދާޅުވިއެވެ.

މިދިޔަ ސަރުކާރުން ވަނީ އެމްއެމްޕީއާރްސީގެ ޚިޔާނާތުގައި ހިމެނޭ ބައެއް ފަރާތްތަކަށް ތަފާތު އިމްތިއާޒްތަކެއް ލިބިދީ އެމީހުންގެ މައްޗަށް އިތުރު ދަޢުވާ ނުކުރުމަށް އެއްބަސްވެ، އިއުތިފާރުގެ އެއްބަސްވުންތައް ހަދާފައެވެ. އެގޮތުން އެ ޚިޔާނާތުގައި ހިމެނޭ އެންމެ އިސްއެކަކުކަމަށްވާ ކުރީގެ ނައިބު ރައީސް އަހުމަދު އަދީބުއާ ދެމެދުވެސް ވަނީ އިއުތިރާފުގެ އެއްބަސްވުމެއް ހަދާފައެވެ. އެ އެއްބަސްވުމުގެ ދަށުން އޭނާގެ މައްޗަށް ކުރި ހުމުވަނީ 20 އަހަރަށް ކުރުވެފައެވެ. ނަމަވެސް 20 އަހަރުގެ ޖަލުހުކުމެއް އަދީބުގެ މައްޗަށް އިއްވިނަމަވެސް، ކުރީ ސަރުކާރުގައި އޭނާ ވަނީ ގޭ ބަންދަށް ބަދަލުކޮށް، އަދި ރައީސް ސޯލިޙްގެ ވެރިކަމުގެ އެންމެ ފަހު ދުވަސްވަރު އަދީބުގެ ހުކުމް މާފުކޮށް، އެނާ ވަނީ މިނިވަންކޮށްފައެވެ.

އަދީބުގެ އިތުރުން އެއްބަސްވުން ހަދާފައިވާ މީހުންގެ ތެރޭގައި:

1. މ. ލޭންޑް އޮފް ގާރޑެން، އަޙްމަދު އިޝްފާޙް ޢަލީ

2. މ. ސެސްނާ، މުޙައްމަދު ޢައްލާމް ލަޠީފް

3. ގ. އޮއިވާލި، މުޙައްމަދު ޙުސައިން ހިމެނެ އެވެ.

އެއްބަސްވުންތައް ނިމުމަކަށް ގެނައުމަށް ޕްރޮސިކިއުޓަރ ޖެނެރަލް ނިންމެވީ މި އެއްބަސްވުންތައް އެކުލަވާލާފައިވަނީ އެމްއެމްޕީއާރސީގެ ޚިޔާނާތުގެ މައްސަލައިގެ ތަޙުޤީޤު ކުރިއަށްގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައިކަމަށްވީ ނަމަވެސް، މި މީހުންގެ ފަރާތުން މައްސަލައިގެ ތަޙުޤީޤަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ލިބެމުން ނުދާކަމަށް ތަޙުޤީޤީ އިދާރާތުން މަޢުލޫމާތުދީފައިވާތީއެވެ.

ކުރީގެ ޕީޖީ ހަދާއިވާ އެއްބަސްވުންތައް އުވާލުމުން، ޚިޔާނާތުގައި ހިމެނޭ އިސްވެރިންގެ މައްޗަށް ކުރެވޭ ތުހުމަތުތައް ތަހުގީގުކޮށް އަލުން ދައުވާކުރުމުގެ ފުރުުސަތު ފަހިވެގެން ދާނެއެވެ.