ސްޓޭޓް އިލެކްޓްރިކް ކޮމްޕެނީ، ސްޓެލްކޯގެ މޯބައިލް އެޕަށް ޑީޑޮސް ހަމަލާތަކެއް ދީފިއެވެ.

ސްޓެލްކޯއިން ބުނީ ރަމަޟާން މަހާ ދިމާކޮށް ސަރުކާރުން ހިންގަމުންދާ މަސްދަޅު ބެހުމުގެ ޕްރޮގްރާމަށް އޮންލައިން ޓޯކަން ދޫކުރަން ފެށި ވަގުތާ ދިމާކޮށް، އެ ކުންފުނީގެ މޯބައިލް އެޕްލިކޭޝަނަށް ބޭރު ޤައުމުތަކުން ޑިސްޓްރިބިއުޓެޑް ޑިނައަލް އޮފް ސަރވިސް (ޑީޑޮސް) ހަމަލާތައް ދީފައިވާ ކަމަށެވެ. ހަމަލާގެ ސަބަބުން އެޕްލިކޭޝަންގެ ހިދުމަތް މެދު ކެނޑުނުކަމަށްވެސް ސްޓެލްކޯއިން ބުންޏެވެ.

ނަމަވެސް ކުޑަ ވަގުތުކޮޅެއްގެ ތެރޭގައި ހަމަލާތައް ހުއްޓުވާ، އެޕްލިކޭޝަންގެ ހިދުމަތް އަލުން ދީފައިވާ ކަމަށް ސްޓެލްކޯއިން މައުލޫމާތު ދެއެވެ. އަދި މިކަމުގެ ސަބަބުން ކަސްޓަމަރުންނަށް ދިމާވި ދަތިތަކަށް އެކުންފުނިން ވަނީ މާފަށްވެސް އެދިފައެވެ.

ސަރުކާރުން ރަމަޟާން މަހާ ދިމާކޮށް ބަހަމުންދާ ރޯދަ ހަދިޔާ ދޫކުރަނީ ކަރަންޓު މީޓަރުގެ ނަންބަރު ބެލުމަށްފަހުގައެވެ. އެހެން ކަމުން ގިނަ ބަޔަކު ސްޓެލްކޯ އެޕްލިކޭޝަން މެދުވެރިކޮށް އެ މައުލޫމާތު ބަލަމުންދާކަން ފަހަގަކުރެވެއެވެ.